Posts filed under ‘பலகார வகைகள்’

பிடி கொழுகட்டை/வெல்லக் கொழுகட்டை/vellak kozukattai

தேவையான பொருட்கள்

பச்சரிசி மாவு – 2 கப்
வெல்லம் – 1 1/2 கப்
தேங்காய் – சிறிதளவு [சிறு பற்களாக நறுக்கியது]
ஏலக்காய் – சிறிதளவு

செய்முறை

அரிசி மாவை இட்லி குக்கரில் நீராவியில் வேகவைத்து எடுத்து வைக்கவும்.

வெல்லத்தை சறிதளவு தண்ணீரில் கரைத்து நன்றாகக் கொதிக்கவைத்து வடிகட்டவும்.

வெல்லக் கரைசல், தேங்காய், ஏலக்காய் ஆகியவற்றை அரிசி மாவில் கொட்டிக் கிளறவும்.

அரிசி மாவுக் கலவையைத் தொட்டால் கையில் ஒட்டாமல் வரவேண்டும். [பிசுபிசுப்பு இல்லாமல்]
தேவையானால் ஒரு தே.கரண்டி எண்ணை ஊற்றிக்கொள்ளவும்.

அரிசி மாவுக் கலவையை கைகளால் பிடித்து இட்லி குக்கரில் வைத்து 15 நிமிடம் வேகவிடவும்.
பிடிகொழுகட்டை தயார்.

குறிப்பு
வெல்லத்தின் அளவு உங்கள் சுவைக்கேற்ப கூட்டியோ குறைத்தோ போடலாம்.

திசெம்பர் 2, 2010 at 10:42 முப 1 மறுமொழி

Ribbon Pakoda / ஓலைப் பக்கோடா

தேவையான பொருட்கள்:-
———————————

கடலை மாவு – 3 கப்
அரிசி மாவு – 1 கப்
மிளகாய் தூள் – 5 தே கரண்டி (அ) தேவையான அளவு
உப்பு – தேவைக்கேற்ப
சோடாமாவு – சிட்டிகை அளவு
எண்ணை பொரித்தெடுக்க
முறுக்குக் குழாய், ரிப்பன் அச்சு

செய்முறை:
—————

*கடலைமாவு, அரிசி மாவு, உப்பு, மிளகாய்த்தூள்,சோடாமாவு ஆகியவற்றை ஒன்றாக கலந்து சலித்து வைத்துக்கொள்ளவும்.

*தேவையான அளவு நீர் ஊற்றி முறுக்கு மாவு பதத்திற்கு பிசையவும்.

*காய்ந்த எண்ணை ஊற்றி மேலும் இலகுவாக பிசையவும்.

(கடினமாக இல்லாமல் பிழிவதற்கு ஏற்றவாரு இலகுவாக இருக்க வேண்டும் அதேசமையம் பிசுபிசுப்பின்றி இருக்கவேண்டும்)

*கடாயில் எண்ணை ஊற்றி, காய்ந்ததும் ரிப்பன் அச்சு கொண்டு எண்ணையில் பிழிந்து பொரிக்கவும்.

*செம்பொன்னிறமாக வந்ததும் எடுத்து ஆறவைத்துப் பரிமாறவும்.

நவம்பர் 11, 2010 at 5:11 பிப 1 மறுமொழி

பீட்ரூட் ஜாமுன் அல்வா

தேவையான பொருட்கள்
—————————
பீட்ரூட் – 1 (துருவியது)
குலாப் ஜாமுன் மிக்ஸ் – 4 தே. கரண்டி
காய்ச்சின பால் – 1 கப்
சர்க்கரை – 2/3 கப் (அல்லது தேவையான அளவு)
நெய் – 4 தே. கரண்டி
ஏலக்காய் தூள் – சிறிதளவு
முந்திரி துண்டுகள் – நெய்யில் வறுத்தது சிறிதளவு
தண்ணீர் – 1/2 கப்

செய்முறை
————

ஒரு கனமான பாத்திரத்தில் 2 தே. கரண்டி நெய் விடவும்.

நெய் உருகியதும் அதில் பீட்ருட் துருவலைப் போட்டு நன்றாக வதக்கவும்.

நன்றாக வதங்கியதும் தண்ணீர் விட்டு வேகவிடவும்.

தண்ணீர் சுண்டியதும் காய்ச்சின பால் விட்டு கிளறி வேக விடவும்.

நன்றாக கொதித்து வரும்போது குலாப் ஜாமுன் மிக்ஸ் தூவி நன்றாக கிளறவும்.

பால் சுண்டியதும் சர்க்கரை, 1 தே. கரண்டி நெய் விட்டு கிளறி விடவும்.

அல்வா சுருண்டு வரும்போது மீதமுள்ள நெய், முந்திரி, ஏலக்காய் தூவி கிளறவும்.

நெய் தடவிய கிண்ணத்தில் சேமிக்கவும்.

ஒக்ரோபர் 2, 2009 at 9:35 முப 1 மறுமொழி

பூந்தி லட்டு

தேவையான பொருட்கள்
————————-
கடலை மாவு – 2 கப்
எண்ணை – பூந்தி செய்ய
சக்கரை – 2 கப்
நெய் – 3 தே. கரண்டி
ஏலக்காய் தூள் – சிறிதளவு
முந்திரி, பாதாம் – சிறியதாக நறுக்கியது சிறிதளவு
காய்ந்த திராட்சை – சிறிதளவு
கச கசா – சிறிதளவு
மஞ்சள் நிறமி – சிறிதளவு (ஃபுட் கலர்)

ஜல்லி கரண்டி/பூந்தி கரண்டி/slotted spoon

செய்முறை:
————

கடலைமாவு, ஃபுட் கலருடன் சிறிதளவு தண்ணீர் சேர்த்து பஜ்ஜி மாவு பதத்திற்கு கரைக்கவும்.

வாணலியில் தேவையான அளவு எண்ணை ஊற்றவும்.

எண்ணை நன்கு காய்ந்ததும் பூந்தி கரண்டியை எண்ணை மேலாக பிடித்து சிறிதளவு கடலைமாவு கலவையை அதில் ஊற்றி பூந்திகளை பொரித்தெடுக்கவும்.

அதே சமயம் மற்றொரு பாத்திரத்தில் 2 கப் சர்க்கரை, 3/4 கப் தண்ணீர் சேர்த்து பாகு காய்ச்சவும். ( கட்டை விரல் மற்றும் ஆள்காட்டி விரலில் எடுத்துப் பார்த்தால் கம்பி போல் வரவேண்டும்)

நெய்யில் கச கசா, முந்திரி, பாதாம், திராட்சை பொரித்து நெய்யுடன் ஏலக்காய் சேர்த்து பாகில் கலக்கவும்.

பாகு, பூந்தி இரண்டையும் சூடாக இருக்கும்போதே ஒன்றாக கலக்கவும்.

கைப்பொருக்கும் சூட்டில் உருண்டைக்ளாக பிடித்து வைக்கவும். ஆறியதும் பரிமாறவும்.
(கையில் சிறிது நெய் பூசிக்கொண்டு லட்டு பிடிக்கவும்)

செப்ரெம்பர் 1, 2009 at 3:23 பிப 1 மறுமொழி

உப்பு உருண்டை/ உப்பு கொழுகட்டை/ uppu urundai / uppu kozukattai

இது என் அம்மா எனக்குச்சொன்ன சமையல் குறிப்பு

தேவையான பொருட்கள்

புழுங்கல் அரிசி – 2 கப்
கடலை பருப்பு – 1/2 கப்
தேங்காய் – சிறிதளவு (சிறு பற்களாக நறுக்கியது)
கடலை பருப்பு – ஒரு பிடி
காய்ந்த மிளகாய் – 5
கடுகு, உளுந்து தாளிக்க
எண்ணை சிறிதளவு
உப்பு தேவையான அளவு

செய்முறை

அரிசியை , பருப்பை தண்ணீரில் 8 மணி நேரம் ஊரவிடவும்.

பருப்பை கரகரப்பாக அரைக்கவும். அரிசியை மிருதுவாக அரைத்து முன்னம் அரைத்த பருப்புடன் சேர்த்து, உப்பு சேர்த்துக் கலந்து வைக்கவும்.

ஒரு வாணலியில் சிறிதளவு எண்ணை விட்டு அதில் கடுகு உளுந்து போட்டு தாளிக்கவும்.

பிறகு அதில் காய்ந்த மிளகாய், கடலை பருப்பு, தேங்காய் ஆகியவற்றைப் போட்டு வதக்கவும்.

கலவை நன்றாக வதங்கியதும் அதில் அரிசி, பருப்புக் கலவையைக் கொட்டிக் கெட்டியாகும்வரை கிளறவும்.

சிறிது நேரம் சென்றபின் அடுப்பிலிருந்து இறக்கி ஆறவிடவும்.

ஓரளவு ஆறிய பிறகு அந்தக் கலவையை உருண்டைகளாக உருட்டி இட்லி குக்கரில் வைத்து(கொழுகட்டை வேகவைப்பது போல்) வேகவைத்து எடுக்கவும்.

சுவையான உப்புருண்டை தயார். இதை மாலை உணவாக பரிமாறலாம்.

மே 30, 2008 at 1:26 பிப 1 மறுமொழி

பப்பாளி பழ அல்வா (Papaya halwa )

papaya halwa

தேவையான பொருட்கள்:

பப்பாளி பழ துண்டுகள் : 3 கப்
சர்க்கரை : 3/4 கப் (உங்கள் தேவைக்கேற்ப)
நெய் : 4 தே. கரண்டி
காய்ச்சின பால் : 1/2 கப் (உங்கள் தேவைக்கேற்ப)
ஏலப்பொடி – சிறிதளவு
முந்திரி – 7
பாதாம் பருப்பு – 7

செய்முறை:

  1. முந்திரி பருப்பை நெய்யில் வறுத்து சிறு துண்டுகளாக்கிக் கொள்ளுங்கள்.
  2. பாதம் பருப்பை மெலிதாக நறுக்கிக்கொள்ளவும்.
  3. அடி கனமான பாத்திரத்தில் சிறிது நெய்விட்டு பப்பாளி பழ துண்டுகளை போட்டு வதக்குங்கள்.
  4. பச்சை வாடை போனதும் காய்ச்சின பாலை ஊற்றி நன்கு வேக விடவும்.
  5. பப்பாளி குழைந்து வரும், அதனுடன் சர்க்கரை சேர்த்து கிளறி விடவும்.
  6. அல்வா சுண்டிவரும்போது மீதமுள்ள நெய்விட்டு கிளறிவரவும்.
  7. பாத்திரத்தில் அல்வா ஒட்டாமல் வரும்பொது முந்திரி, பாதாம், ஏலப்பொடி தூவி கிளறி இறக்கவும்.
  8. பப்பாளி பழ அல்வா தயார்.

குறிப்பு:
பப்பாளி நன்றாக பழுத்ததாக இருக்கவேண்டும் (தோல் மஞ்சள் நிறமாக இருக்கும்)
பப்பாளி இயல்பாகவே இனிப்பு என்பதால் சர்க்கரை அளவை குறைத்துக்கொள்ளுங்கள்.
பழம் கிடைக்கவில்லையென்றால் பப்பாளிக்காயிலும் செய்யலாம்.
செய்முறை

  • பப்பாளிக்காயை தோல் நீக்கி துறுவிக்கொள்ளவும்.
  • சர்க்கரை 2 கப் பப்பாளிக்கு 1 கப் வீதம் போடலாம். (காயில் இனிப்பு குறைவு)
  • நிறத்துக்கு சிறிதளவு கேசரிபொடி உபயோகிக்கலாம்.
  • மற்ற செய்முறை மேற்கூறியவாறுதான்.

மே 2, 2008 at 5:47 பிப 2 பின்னூட்டங்கள்

பச்சரிசி ஹல்வா (Rice Halwa)

என் அம்மா எப்பவும் செய்யும் ஒரு பலகாரம் இது, அரிசி ஹல்வான்னுதான் சொல்லிப் பழக்கம் வேறு பெயர் இருக்கா தெரியலைங்க.

தேவையான பொருட்கள் ( 4 பேருக்கு)
_______________________
பச்சரிசி மாவு : 2 கப்
கடலை பருப்பு : 1 கப்
வெல்லம் : 11/2 கப்
நெய் : 1/2 கப்
முந்திரி, ஏலப்பொடி சிறிதளவு

செய்முறை:
___________

*அரிசிமாவுடன் தண்ணீர் சேர்த்து தோசைமாவு பதத்திற்கு கரைத்து வைக்கவும்.

*சிறிதளவு நெய்யில் முந்திரி பருப்பை வறுத்து எடுத்து வைக்கவும்.

*ஒரு கனமான பாத்திரத்தில் கடலைபருப்புடன் 3 கப் தண்ணீர் சேர்த்து வேகவிடவும். குழையக் கூடாது ஓரளவுக்கு திடமாக இருக்க வேண்டும்.

*பருப்பு வெந்தவுடன் அதில் அரிசிமாவுக் கரைசலை ஊற்றி கிளறிக்கொண்டே இருக்கவும். மாவு வெந்துவரும். (தண்ணீர் கையில் தொட்டு மாவை தொட்டுப் பார்த்தால் ஒட்டாது இருக்க வேண்டும் இதுதான் பதம்.)

*வெல்லத்துடன் சிறிது தண்ணீர் ஊற்றி கரைத்து வடிகட்டவும். இந்த வெல்லத்தண்ணீரை சிறிது நேரம் அடுப்பில் வைத்து கொதிக்கவைத்து வெந்த அரிசிமாவுடன் சேர்த்துக் கிளறவும்.

*முந்திரி , ஏலப்பொடி, நெய் சேர்த்து கிளறி விடவும்.

*பாத்திரத்தில் ஒட்டாமல் வரும்பொழுது இறக்கிவிடவும்.

ஒரு அகலமான பாத்திரத்தில் நெய் தடவி அதில் இந்த பச்சரிசி ஹல்வாவை ஊற்றவும். ஆறினதும் பரிமாறவும்.

குறிப்பு:
______
ஹல்வாவை கிண்டிக்கொண்டே இருக்கவேண்டும் இல்லையெல் அடிபிடித்து விடும்.
பாத்திரத்தில் ஒட்டாமல் வரும்பொழுது இறக்கிவிடவும்.ரொம்ப கெட்டியாவும் இருக்க கூடாதுங்க :)
உங்களுக்கு விருப்பமான நெய் இன்னும் சேர்த்துக்கலாம். சாப்பிட நல்லாயிருக்கும் ஆனா உடம்புக்கு ஆகாதில்லையா?
(அப்படிப்பார்த்தா வெல்லம்,அரிசி மாவும், முந்திரி,பருப்பு… ஹலோ.. அப்ப ஹல்வாவை எப்படித்தான் கிண்டுறது ?? :))

ஏப்ரல் 28, 2008 at 2:52 பிப 3 பின்னூட்டங்கள்

கடலைமாவு கட்லெட்

தேவையான பொருட்கள்

கடலை மாவு : 1 1/4 கப்
உருளைக்கிழங்கு – 3
பச்சை மிளகாய் – 5
வெங்காயம் – 3
மிளகாய்த்தூள் – 1/2 தேக்கரண்டி
கடுகு,சீரகம், சோம்பு,உளுத்தம்பருப்பு – 1/2 தே.கரண்டி (ஒவ்வொன்றும்)
நெய் -சிறிதளவு
கறிவேப்பில், கொத்துமல்லி- சிறிதளவு
உப்பு தேவையான அளவு
எண்ணை – தேவையான அளவு

செய்முறை

பச்சைமிளகாய், வெங்காயம், கறிவேப்பிலை, கொத்துமல்லி ஆகியவற்றை பொடியாக நறுக்கவும். உருளைக்கிழங்கை வேகவைத்து எடுத்ஹ்து தோலுரித்துக் கொள்ளவும்.

அடுப்பில் வாணலியை வைத்து அதில் எண்ணை ஊற்றி காய்ந்ததும் கடுகு, உளுந்து, சீரகம், சோம்பு ஆகியவற்றைப்போட்டுத் தாளித்துக்கொள்ளவும்.

பிறகு நறுக்கி வைத்திருக்கும் வெங்காயம், பச்சைமிளகாய், கறிவேப்பிலை ஆகியவற்றைப் போட்டுச் சிவக்க வதக்கிக்கொண்டு வேகவைத்த உருளைக்கிழங்கையூம் போட்டு வதக்கிக் கொள்ளவேண்டும்.

அதன்பின் மிளகாய்த்தூளையும் உப்பையும் போட்டு நன்கு மசித்துக்கொள்ளுங்கள். கடைசியாக கொத்துமல்லித்தழையையும் போட்டு நன்றாக கிளறிவிடுங்கள்.

ஒரு பாத்திரத்தில் கடலை மாவைக் கொட்டிச் சிறிது நீர்விட்டுக் கெட்டியாகப் பிசைந்து அதைச் சிறு சிறு உருண்டைகளாக உருட்டிக் கொள்ளவும்.

அந்த மாவு உருண்டைகளை வட்ட வடிவில் தேய்த்துக்கொண்டு அவற்றின் நடுவே மசாலாவை வைத்து முக்கோண வடிவில் மடித்துக்கொள்ளவும்.

வாணலியில் எண்ணைவிட்டு காய்ந்ததும் கட்லெட்டுகளை ஒவ்வொன்றாக போட்டு எடுக்கவும்.

இதை தக்காளி சாஸுடன் பரிமாரலாம்.

ஏப்ரல் 25, 2008 at 1:46 பிப பின்னூட்டமொன்றை இடுக

கட்லெட் (Vegetable cutlet)

தேவையான பொருட்கள்:

உருளைக்கிழங்கு : 7
குடைமிளகாய் : 1 (சிறு துண்டுகளாக நறுக்கியது)
கேரட்,பீட்ரூட்,பட்டாணி போன்ற விருப்பமான காய்கறிகள் : 2 கப் (நன்றாக நறுக்கியது)
பிரட் கிரம்ஸ் : 1 கப்
சோளமாவு/மைதா மாவு : 2 அல்லது 3 ஸ்பூன்
எண்ணை தேவையான அளவு
உப்பு தேவையான அளவு
சிறிதளவு சோம்பு (உடைத்தது.)

செய்முறை:

* முதலில் உருளைக்கிழங்கை நன்றாக வேகவைத்து தண்ணீர்விடாமல் கெட்டியாக மசித்து வைத்துக்கொள்ளவும்.

*வாணலியில் எண்ணை விட்டு காய்ந்ததும் சோம்பு போட்டு பின்னர் குடைமிளகாய், காய்கறிகளை அதில் சேர்த்து நன்றாக வதக்க வேண்டும். தேவையான அளவு உப்பு சேர்த்து நன்றாக கிளறி முக்கால் பாகம் வேகும் வரை வைத்திருக்கவும். (தண்ணீர் சேர்க்கக் கூடாது)

*இந்த காய்கறிக் கலவையை மசித்து வைத்திருக்கும் உருளைக்கிழங்குடன் சேர்த்து நன்றாக பிசையவும். மிகவும் இலகுவாக இருந்தால் சிறிதளவு சோளமாவு சேர்த்துக் கொள்ளலாம்.

*ஒரு அகலமான தட்டில் பிரட் கிரம்ஸ் கொட்டி பரவலாக வைக்கவும். மற்றொரு தட்டில் சிறிதளவு தண்ணீருடன் சோளமாவு/மைதாமாவு சேர்த்து கரைத்து வைத்துக்கொள்ளவும்.

*காய்கறிக் கலவையை சிறிய உருண்டைகளாக்கி தட்டி(வடைக்கு செய்வது போல் சற்று தடிமனாக) அதனை சோளமாவு கலவையில் புரட்டி பின்னர் பிரட் கிரம்ஸில் புரட்டி தனியாக வைக்கவும்.(மாவு இலகுவாக இருந்தால் புரட்டும்போது உடைந்துகொள்ளும் கவனமாக செய்யவும்)

*எல்லா கலவையும் இப்படி செய்து முடித்தபின் இந்த கட்லெட் டை அரைமணி நேரம் ஃபிரிட்ஜில் வைத்திருந்து எடுக்கவும்.

*பின்னர் ஒரு தோசைக்கல்லில் சிறிது எண்ணைவிட்டு கட்லெட்டுகளை போட்டு செந்நிறாமாக வருத்து எடுக்கவும். ஒரு பக்கத்துக்கு சுமார் 2 நிமிடம் இருந்தால் போதும்.

*சுவையான கட்லெட்டை டொமாடோ சாஸுடன் பரிமாரவும்.

குறிப்பு:
இதை எண்ணையில் பொரித்தும் எடுக்கலாம் ஆனால் கலவை சரியாக இல்லையெனில் தனித்தனியாக பிய்ந்து விடும் கவனம்.

தண்ணீர் சேர்க்காமல் செய்யவும் அப்பொழுதுதான் சரியான பதத்துக்கு கலவை கிடைக்கும்.

உங்களுக்கு விருப்பமான காய்கறிகளை சேர்க்கலாம்.

பிரட் கிரம்ஸ் இல்லையென்றால் சில பிரட் துண்டுகளை தோசைக்கல்லில் போட்டு எடுத்து மிக்ஸியில் கரகரப்பாக அரைத்துக்கொள்ளவும்.

ஏப்ரல் 25, 2008 at 7:39 முப பின்னூட்டமொன்றை இடுக

முறுக்கு

இது என் அம்மா சொன்ன ஒரு எளிமையான குறிப்பு.

தேவையான பொருட்கள்:
********************

அரிசி மாவு : 2 கப்
பொட்டுக்கடலை மாவு : 1 கப் (பொட்டுக்கடலையை மிக்சியில் அரைத்து சலித்துக்கொள்ளவும்)
சீரகம்: 2 தேக்கரண்டி
எள்ளு: 2 தேக்கரண்டி
பெருங்காயம்: சிறிதளவு
உப்பு: தேவையான அளவு
எண்ணை: முறுக்கு சுட தேவையான அளவு

செய்முறை:
**********
அரிசி மாவு, பொட்டுக்கடலை மாவு, சீரகம், எள்ளு, பெருங்காயம், உப்பு ஆகிய அனைத்தயும் ஒன்றாக கலந்து அதில் கொஞ்சம் சூடான நீர் விட்டு பிசைந்து கொள்ள வேண்டும். (மாவு இலகுவாக இருக்க வேண்டும் கடினமாகவோ/அதிகம் தண்ணீரோ இருக்க கூடாது)

கடாயில் எண்ணையை ஊற்றி சூடானவுடன் அதிலிருந்து 5/6 தேக்கரண்டி எடுத்து மாவுடன் சேர்த்து பிசைந்து கொள்ளவும்.

உங்கள் விருப்பப்படி முறுக்கு குழாயில் மாவு போட்டு பிழிந்து பொன்நிறமாக சுட்டு எடுக்கவும்.

அவ்வளவுதான். சூடான முறுக்கு, சுவையான முறுக்கு தயார்.

ஏப்ரல் 3, 2008 at 10:56 முப 2 பின்னூட்டங்கள்


பக்கங்கள்


Follow

Get every new post delivered to your Inbox.